已穩奪G組首名嘅曼城，作客肯定包尾嘅貝爾格萊德紅星，賽果無關痛癢，但無損投注價值。貝爾格萊德紅星雖然小組5戰只得1和4負，但佢主場出擊鬥志好，連外圍賽今屆4次主場3次開4球或以上，曼城踢歐聯分組賽亦寓賽於操，近5場歐聯4次總入球多過3球，3.5球嘅入球大值捧。（Now聽643周四凌晨1時45分直播）

呢場喺塞爾維亞進行，東歐開波時間早少少，啱晒球迷搵啲本再喺4點場搏殺。貝爾格萊德紅星已出局無乜心理負擔，主場出擊鬥歐洲冠軍兼英超三冠王，梗係希望製造吓爆冷賽果，如果真係贏咗，之後班球員可以同個孫講：「曼城贏完歐聯冠軍，嚟我哋主場都要輸呀！」幾威水，鬥心不容懷疑。

事實上，今屆兩軍分組賽首循環碰頭，即使貝爾格萊德紅星作客，佢哋都係先入波嗰隊，而且球隊主場踢法進取，連外圍賽在內，今屆4次主場出擊，3次開4球或以上，另一次都有3球，入得又失得。

「藍月」出副選一樣夠殺
「藍月亮」早前經歷聯賽4場不勝，啱啱聯賽反勝盧頓挽回部分面子，領隊哥迪奧拿希望透過比賽盡快調整球隊信心及狀態，上輪歐聯對RB萊比錫前亦已出線，曼城仍然於落後下反勝，證明任何情況下都依然博盡。曼城板櫈深度足夠，即使出副選一樣夠入波，冇艾寧夏蘭特唔緊要，仲有祖利安艾華利斯，呢名阿根廷前鋒上次鬥紅星都入2粒，「藍月亮」近5場歐聯4次開4球或以上，3.5球入球大放心捧。