今晚「死亡F組」另一場大戰，就係法甲豪門巴黎聖日耳門（PSG）作客已篤定出線嘅多蒙特。PSG今場要贏波先可以確保出線，不過佢哋作客演出頗差，讓唔起對主場威力強勁嘅「蜜蜂軍團」，捧多蒙特「+1」嘅讓球主勝係明智之選。（Now聽643周四凌晨4時直播）

焗住搶攻更易失守
有基利安麥巴比掛帥嘅PSG，今場要贏波先可以確保出線，就算和波都有機會被紐卡素爬頭，今場要盡地一煲爭勝，鬥志無庸置疑。可惜PSG近3場歐聯作客輸晒，而且進攻核心奧士文尼迪比利今場停賽，大大削弱球隊創造力，加上本身PSG屬攻強守弱嘅球隊，今鋪形勢上焗住主攻，隨時令後防暴露更多空位，實在不宜高估。

另邊廂，多蒙特已經肯定出線，但今仗如果輸波將被PSG搶走首名資格，為保淘汰賽優勢，「蜜蜂兵團」唔會放軟手腳。佢哋喺歐聯主場戰績非常穩定，對上7場歐聯主場4勝3和不敗，當中更有6場係冇失波，估計憑主場之利可望保住不敗，「讓球主客和」PSG讓一球，多蒙特讓球勝值得捧場。