西甲開咧！
西甲新季喺香港時間周五凌晨正式展開，開鑼戰由畢爾包主場迎戰基達菲。兩隊踢法實而不華，畢爾包牌面秤先，但佢哋喺熱身賽狀態麻麻，面對基達菲未必搵到着數，和波值博。
（Now聽632周五凌晨1時直播）

畢爾包上季排西甲第5名，兼且贏得西盃冠軍，最大原因係韌力夠強，防守穩健唔會輕易被擊敗。畢爾包今季保留大部分主力，包括最近改着10號嘅尼高拉斯威廉斯，教練華爾維迪建立嘅穩陣戰術相信可以維持，不過西班牙國腳「尼威」踢完歐國盃後，錯過畢爾包所有季前熱身，狀態成疑，加上門將烏尼西蒙養傷，畢爾包想贏波打響頭炮都唔係咁易。

基達菲大換血守住先
基達菲今季大換血，上季借用嘅格連活特等多名球員離隊，進攻方面肯定冇咁銳利，但佢哋保持防守效率，近兩場熱身賽先贏聖伊天1比0，上場再悶和修咸頓0比0，作戰狀態更勝畢爾包。睇番畢爾包近6次同基達菲交手，當中有5次打成平手，開鑼第1場未入局下，再和機會頗高。