阿仙奴里昂半場駁火娛賓

一年一度嘅酋長盃今晚上演，由東道主阿仙奴迎戰里昂。阿仙奴為備戰即將開鑼嘅英超谷到行，近期賽事例必搶韁；里昂亦有射手米卡達捷來投，預計一開波就駁火，隨時半場已經好多波入。（周日晚9時開賽）

兵工廠谷到行迎新季
「兵工廠」為求以最佳狀態迎接新一季英超，今夏頻頻拍跳，先喺美國之旅連鬥般尼茅夫、曼聯同利物浦，日前返英又再出戰德甲盟主利華古遜，錄得2勝1和1負，狀態明顯不斷提升，尤其係上仗大炒利華4比1，夏維斯1入波2助攻，熱身賽所見加比爾捷西斯更屬最快入局一員，就算唔計啱啱歸隊嘅布卡約沙卡、迪格蘭賴斯等英格蘭國腳，其餘眾將已上晒力。阿仙奴近3場半場全開2球或以上，可見擅於初段搶攻爭士哥。

里昂人腳未齊，剛替法國男奧足出戰奧運嘅拿卡錫迪及卓基等未歸隊，不過有今夏歐國盃攻入3粒嘅格魯吉亞前鋒米卡達捷加盟，佢上季下半季返回梅斯即有11粒進帳，雖然未能護級成功，但佢嘅表現不容忽視。雙方近3次碰頭都係熱身賽，其中兩次係酋長盃，阿仙奴錄得2勝1負，合共製造12粒士哥，相信今場一開波就鬥攻，上演入球騷娛樂球迷。