男奧足C組最後一輪，已提早出線嘅西班牙男奧足會對排第2名嘅埃及男奧足。上屆銀牌得主「小狂牛」兩戰全勝晉級後，今仗多數留力應付淘汰賽，預料戰術會較為保守，半場和波機會甚高。（周二晚9時開賽）

西班牙被視為奪金熱門，頭兩輪贏烏茲別克男奧足同多明尼加共和國男奧足，似乎都未出盡全力，兩仗都係下半場先發力贏波。今仗佢哋有中堅古巴斯停賽，其餘主力亦可能會被安排休息，雖然後備球員都具備一定實力，但踢法上肯定會貫徹控球上嘅絕對優勢，唔會過份冒險搶攻。

埃及唔輸就掂必死守
埃及今屆表現出頑強防守，頭兩輪有1勝1和兼不失1球，依家有4分在手，今場只要唔輸波就可以晉級8強，面對強敵西班牙絕對唔敢輕率搶攻，繼續靠堅固防守搶分。西班牙向來踢法慢熱，過去8場男奧足賽事，有7場半場同對手打和，今場一於再追半場和。文:工廠仔