尋日凌晨U21歐國盃出現極大爭議，D組首輪賽事，意大利U21以1比2不敵法國U21。意軍今場輸得冤枉，佢哋補時階段曾經「入波」，但球證竟然睇唔到個波越過白界，喺冇VAR同冇門線技術協助下，意大利U21慘情輸波。

1:2僅負法國
意大利U21有大國腳辛度東拿利領軍，法國U21亦有皮爾卡魯魯等喺意甲搵食球員。22分鐘卡利穆恩度入波為法國領先，36分鐘，皮亞圖柏歷基接應辛度東拿利罰球頂入，半場踢成1比1。法國U21喺62分鐘再由巴高拿建功，到補時出現爭議一幕，意大利守將比拿路華頭槌中內柱後，被法國守將白界內用身體擋出，重播顯示個波好大機會過晒白界，但球證最終未有判入。

意大利U21教練尼高拿圖賽後嬲爆：「我覺得球證對比賽結果嘅影響太大，我哋輸畀一支好出色嘅球隊，但我哋表現都好好，只係唔夠運。」