今晚韓職有「1哥」金泉尚武主場迎戰FC水原。金泉尚武今季異軍突起，主場成績彪炳係關鍵，以其近5主場贏4次氣勢，絕對唔赦FC水原來犯，主勝放心捧場。（無綫myTV聽SUPER周二晚6時30分直播）

韓職近年都係畀蔚山HD玩晒，不過今季有啲唔同，傳統勁旅全北汽車淪落到包尾，前面幾隊爭冠形勢激烈，金泉尚武、蔚山HD、浦項制鐵、FC江原，4隊只有3分差距，而且排榜首嘅竟然係金泉尚武，令人驚喜。要知道金泉尚武近幾季都係韓職升降機，今季先再升番上韓職，明顯係列強未摸清呢班波嘅底細，殺各隊一個措手不及，呢支上季韓乙冠軍憑乜嘢力壓群雄？就係靠主場搵食，開咧後21場聯賽所取得嘅40分中，主場就佔咗23分，單計近5場主場就錄得4勝1和，主場出擊有保證。

下游大戰FC大邱秤先
FC水原雖然排緊第5位，但已落後金泉尚武6分，明顯級數有別，而且10場作客贏得4場之餘，只係入得11粒，係前6球隊中作客入波最少球隊，不宜高估。由於爭標各隊咬得好緊，金泉尚武想締造升班即奪冠嘅奇迹，今仗不容有失，鬥心必堅下，主勝捧得過。

同時間開波嘅另一韓職，由FC大邱主場對仁川聯。兩軍都係於下游掙扎，可以話係海軍鬥水兵，仁川聯更加連續7場聯賽未贏過，FC大邱之前3場僅得1和2負，不過對手係爭標分子蔚山HD、金泉尚武同浦項制鐵，贏唔到亦無話可說，查實佢哋近5場主場獲3勝1和1負，表現唔差，主勝有計。