深宵衰波真係極為難頂，今時今日人類有咁多娛樂作選擇，球迷仲能夠坐在電視機前睇英格蘭、法國等悶蛋至極的足球，非常值得尊重，個人則認為講波的更值得歌頌，若果仲要講着好似法國對比利時呢種無限輪迴的衰波，真係地獄級考驗，若果場波係自己個人做直播，我一定會中途終止節目。

有觀眾問我，「你鍾意意大利，咁意大利唔衰咩？」嗱，意大利自己唔叻啫，咪連波都唔要，畀對手攻囉，對手攻唔入都會做到驚險鏡頭，無害人睇衰波喎。但英格蘭、法國甚至平時曼城等控球能力強的球隊，係生人霸死地，霸住個波唔郁唔攻，是不為也，非不能也，這才是我認為的Anti-football。

由意大利教頭蒙迪拿執教的土耳其上場明知唔夠奧地利打，唯有死守，全場被對手狂攻，好彩靠兩個死球戰術入兩粒贏咗，其實亦唔係Anti-football，場波無悶呀，可惜上場入兩球的功臣美列迪美羅就因為入波時做出有政治含意的慶祝動作，要停賽兩場，連爆冷條件都無埋，打條鐵咩！即使荷蘭唔係好勁都係等死，甚至講到高空波爭頂，荷蘭應該更強，今場就買荷蘭上盤兼華基爾雲迪積克首名入球。馬高