車路士依個下半季表現得非常好，如果淨係計下半季係可以上番頭4，近5場更加踢出4勝1和嘅走勢，究竟有啲乜轉變？即刻深入淺出探討一下。

首先當然要講及安素受傷，安素費南迪斯與摩西斯卡些度一同在場，效果永遠係1+1=1，就好似雙特咁，而湊巧安素受傷要做手術，逼使肥普要用到季初嘅三中堅去Build up。3-2 Build up係潮流，用法都係好簡單，就係將古古列拿收入中間，同時三個中堅拉開，前面三個進攻點再加干拿加歷查，變相經常可以壓住對手嚟踢。

肥普並無一本天書睇到老，最深刻印象係對住森林場波，森林Low block + Mid line防守，令中路滴水不漏，輸到1:2後，肥普立刻大刀闊斧，將3中堅Build up改成今季常用嘅側翼進攻，效果立竿見影，先靠史達寧嘅個人技術，攞遠柱入波；第2球憑列斯占士伏兵邊線，馬路古斯圖同卡些度一次撞牆，然之後直接掟個波去邊路，RJ一出，尼古拉斯積遜頭槌入波！將帥憑高質素嘅表現反勝對手。靈活嘅肥普，將佢過去被認定為遲換人甚至唔換人嘅評價扭轉。

車仔反彈除因領隊戰術上嘅部署之外，有無個別球員提升？我留番下集再講。不過今個星期日若果熱刺輸波，我哋車仔贏波嘅話將會上第5，鎖定來屆歐霸資格，嘻嘻。Willhappy