另一場歐協聯4強首回合，費倫天拿主場硬撼布魯日。「紫百合」狀態明顯回落，遇上弗到漏油嘅布魯日，就算有地利亦唔敢輕舉妄動，加上踢親歐協聯例必穩陣行先，半場和值得捧場。（Now 646周五凌晨3時直播）

費倫近年都冇乜捧盃命，上屆先後喺意盃同歐協聯屈居亞軍，而喺今屆意盃4強首回合領先1粒，竟被阿特蘭大喺次回合逆轉，兩回合反輸2比4出局。事實上，「紫百合」狀態跌Watt，各項賽事近7場法定時間贏得2場咁大把，仲要係贏榜尾嘅沙蘭力坦拿同薩斯索羅，自己知自己事，就算有主場之利亦唔敢亂嚟。

布魯日作客睇定踢
更何況今場對手布魯日勁弗，各項賽事豪取7連勝，包括歐協聯8強對PAOK兩回合計豪派3蛋，但畢竟呢支比利時勁旅實力係次一級，而且晉級過程嘅對手，都係PAOK、莫迪同波杜基林特之流，難與費倫相比，加上今場只係首回合兼作客，毋須太進取住。睇番「紫百合」近6場歐協聯，有5次開半場和，今場一定會小心為上，避免先失波，半場和不妨再追。