今晚英超壓尾嘅係阿士東維拉鬥車路士，維拉要保住前4，主場出擊肯定搏命，「車仔」周中冇咗高爾彭馬就輸畀阿仙奴大大鑊，今場呢名英格蘭中場將會復出，加強「車仔」鋒力，可以同維拉鬥攻，中位數3.5球大唔怕捧場。（Now聽621及611周日凌晨3時直播）

周中於「倫敦打吡」慘吞阿仙奴5蛋嘅車路士匆匆再戰，作客又要遇上力爭歐聯入場券嘅阿士東維拉。「車仔」上場缺少高爾彭馬攻力大減，不過球隊後防不穩先至係成績差嘅重點，近10場只有1場保持不失。

不過好彩呢場彭馬仔已復出操練，今仗會復出鬥維拉。高爾彭馬今季各項賽事為車路士射入23球及貢獻13個助攻，淨係近5場有份上陣嘅聯賽就入咗10球，難怪「車仔」上場大敗畀阿仙奴後，畀球迷謔稱「彭馬FC」，事實上尼高拉斯積遜火候未夠，彭馬仔復出絕對係及時雨。

彭馬屈堅斯爭做神射手
維拉陣中亦有一名近況勇猛嘅英格蘭球員，佢就係奧尼屈堅斯，佢今季聯賽已經射入19球，神射手榜只係落後高爾彭馬及艾寧夏蘭特一球。奧尼屈堅斯今季助維拉歐協聯殺入4強，英超亦暫列第4，下屆歐聯入場券近在咫尺，維拉擅於利用主場之利搶分，採取主動，近8場聯賽6次開4球或以上，今場有望同車路士上演入球騷，推介入球大。