今晚又有英冠上演，由西布朗主場迎戰修咸頓，兩隊屬於爭升班分子，西布朗狀態回勇，周中擊敗卡迪夫城，今仗勢必乘勝追擊。至於修咸頓攻力強勁，近3仗合共轟入9球，加上雙方近5次對賽，有4次總入球開3球或以上，最好揀中位數2.5球嘅入球大。

（周六凌晨4時開賽）
西布朗上月底曾經陷入低潮，幸好已經重回正軌，上仗以2比0贏卡迪夫城，近3仗更取得2勝1和。由於西布朗要力保前6位，奪取升班附加賽資格，所以1分都不能少，特別係主場更加要贏波，否則好難向球迷交代，預料會採取主動搶攻。西布朗中場安祖斯韋文狀態相當弗，近3場射入2球及1次助攻，有力攻入修咸頓大門。

修咸頓攻力勁
另邊廂，修咸頓今季保持高水準表現，一度保持連續22場聯賽不敗，直至上仗作客1比3不敵布里斯托城，先至斷纜，相信吸取教訓後，今仗會打醒十二分精神，力爭重敲勝鼓。事實上，修咸頓踢法進取，近13場聯賽作客都有波入，有力同西布朗鬥攻，2.5球大機會高唱入雲。