今輪意甲壓軸戰，沙蘭力坦拿主場迎戰羅馬，包尾嘅沙蘭力坦拿各項賽事4連敗，但為搶分護級，唔可以退縮，必須主動出擊爭勝。羅馬早前換帥，聘請名宿迪羅斯執教，第1場雖然贏波，但防線仍然不穩，不宜高估。翻查兩隊近7次交鋒，有6次總入球開3球或以上，捧中位數2.5球嘅入球大比較划算。（Now 638周二凌晨3時45分直播）

沙蘭力坦拿雖然排意甲榜尾，但攻力其實唔差，聯賽連意大利盃近8場都有波入，包括主場2比2打和勁旅AC米蘭，作客亦能夠喺上季冠軍拿玻里身上取得入球，可見呢支「魚腩球隊」即使遇上傳統名牌球隊，亦唔會刻意死守，其中近5場意甲主場總入球全開3球或以上。老將簡達華狀態出色，今季聯賽已入5球及4次助攻，預料就算沙蘭力坦拿今仗輸波，都應該有能力破蛋。

近年交手多波入
羅馬上輪聯賽由新帥迪羅斯領軍之下，旗開得勝主場以2比1擊敗維羅納，但過程其實險象環生，如非維羅納前鋒杜歷射失12碼，恐怕羅馬未必可以全取3分。不過，羅馬勝在前鋒盧卡古腳風順，今季聯賽已有9球進帳，相信要攻入沙蘭力坦拿大門並非難事。雙方近兩次對賽都打和2比2，今場有望再合演入球騷。