今日澳職獨腳戲，墨爾本城主場迎戰阿德萊德聯，墨爾本城水準非常飄忽，雖然上月曾經以8比1大勝布里斯班獅吼，但其後狀態又走下坡，近兩場聯賽更加全敗，實在冇本錢讓波，加上雙方近8次交鋒，法定時間內阿德萊德聯都保持不敗，讓球客勝值得捧場。

（無綫myTV SUPER周四下午4時45分直播）

墨城水準每況愈下
墨爾本城雖然係上季澳職常規賽冠軍，但今季表現嚴重走樣，教練拉杜維度錫上年11月被炒，改由維迪馬接手領軍，但演出並冇明顯改善。維迪馬接掌帥印以來，墨爾本城各項賽事14戰只有5勝5和4負，勝出率唔夠36%，而且近況不濟，對上兩場聯賽分別不敵西悉尼流浪者及中岸水手，今仗要讓波，未免太受高估。

至於阿德萊德聯表現硬淨，近5場聯賽取得2勝2和1負，踏入2024年後保持3場不敗，包括上仗以4比3擊敗FC悉尼。要留意阿德萊德聯係墨爾本城嘅大剋星，雙方近8次交鋒，以法定時間90分鐘計算，「阿聯」都保持不敗，當中獲得3勝5和，包括今季聯賽首循環以6比0大炒墨爾本城，今仗再交鋒，阿德萊德聯未踢已先贏氣勢，受讓值博。