今晚英超頭場，錫菲聯主場迎戰韋斯咸，兩隊今季表現有一大段距離，包尾嘅錫菲聯近4場聯賽輸3場，想搶分都有心無力，至於「錘仔幫」韋斯咸喺英足盃出局後，勢必更落力爭取英超佳績。雙方近3次交鋒，韋斯咸獲得全勝兼冇失球，今仗客勝超過2倍抵玩。（Now聽621周日晚10時直播）

錫菲聯上仗英足盃大勝英乙球隊基寧咸4比0，皆因對手實力太弱，毫無參考價值，今仗回師英超，相信又會打回原形。

錫菲聯遇強即屈
錫菲聯今季踢20場聯賽僅2勝3和15負，已經成為降班大熱，呢支「升降機」唔單止對強隊毫無還擊之力，甚至遇上同級對手一樣處於劣勢，包括上月作客慘吞般尼5蛋，及主場不敵另一支護級分子盧頓，即使換帥之後，仍然擺脫唔到頹勢。

另邊廂，韋斯咸雖然喺英足盃重賽被英冠球隊布里斯托城淘汰，但「錘仔幫」踢英超水準有保證，近4場聯賽取得3勝1和，包括擊敗曼聯同阿仙奴。前鋒查洛保雲狀態大勇，今季踢19場英超已有11球進帳，「錘仔幫」有望衝擊前4位置，今仗對住「魚腩球隊」錫菲聯，正係搶分好機會，有力反客為主，全取3分而回。