歐聯A組生死戰，曼聯主場硬撼哥本哈根，英超豪門曼聯兩戰兩敗，若然今仗再贏唔到，出線機會將非常渺茫，預料會推前搶攻，防線難免比較空虛，加上門將奧拿拿表現欠佳，隨時被對手偷襲。丹麥球隊哥本哈根突擊力強，近5仗歐聯都先入波，不妨博哥本哈根[第一隊入球]。（Now聽643周三凌晨3時直播）

曼聯今季英超及歐聯雙線表現欠佳，好大程度上由於防線不穩，上仗英超即使對包尾嘅錫菲聯，都未能保持清白之身。紅魔鬼去到水準更高嘅歐聯，後防弱點更明顯，踢兩場歐聯已經失7球，中堅利辛度馬天尼斯、左閘勞基梳爾仍然因傷缺陣，加上防守中場卡斯米路停賽，令問題雪上加霜。

陷出局邊緣紅魔焗攻
最大隱憂係門將奧拿拿頻頻犯錯，成為後防「計時炸彈」，呢位喀麥隆國腳撲救能力甚弱，往往對手只要射中目標，就可以入波，佢嘅信心不斷受打擊之下，今仗隨時被哥本哈根一擊即中。

哥本哈根歐聯例先入球
至於哥本哈根兩戰僅1和1負，同樣急需贏波，雖然佢哋人腳名氣唔及同組另外3支對手，但勝在踢法非常主動，即使對德甲勁旅拜仁慕尼黑，都可以先開紀錄，作客加拉塔沙雷，更加係領先2球之下，末段被呢支土耳其球隊逼和2比2，未能贏波實屬可惜。哥本哈根今仗遇上處於頹勢嘅曼聯，更加無懼主動出擊，希望全取3分而回，有力再次率先入波。