歐國外A組另一場賽事，塞浦路斯主場迎戰挪威。挪威為出線不容再失，但下仗惡鬥西班牙更加關鍵，今仗遇弱定必速戰速決，半場客勝捧得過。

（周五凌晨2時45分開賽）
挪威狀態回勇，各項賽事豪取3連勝，包括近兩輪歐國外贏晒，其中上輪對住格魯吉亞，紐沙兩度妙傳，造就艾寧夏蘭特同馬田奧迪加特各建一功，險勝2比1取得重要3分，保住出線希望，今仗遇上弱旅塞浦路斯，贏波志在必得。

塞浦路斯5輪狂失17粒
塞浦路斯係正宗冇骨魚腩，頭5輪歐國外輸晒之餘，仲狂失17粒，包括上輪慘吞西班牙6蛋，任人魚肉。再睇睇A組形勢，挪威唔單止落後榜首蘇格蘭8分，更打多一仗下落後次席西班牙2分，形勢唔太樂觀，除咗今仗要擊敗塞浦路斯外，下輪對西班牙更加係生死戰，如果贏唔到的話，爭頭兩名直接出線席位嘅機會微乎其微。

既然挪威今仗只係對冇還擊之力嘅塞浦路斯，梗係想盡快鎖定勝局，下半場畀一班主力抖抖，為下仗鬥西班牙留力，加上挪威近4次對住塞浦路斯，全部上半場已取得領先優勢，今仗勢必搶攻，半場客勝有計。