過往交鋒靠死守
喺南美洲區世盃外兩戰全勝嘅阿根廷，聽朝主場迎戰巴拉圭。阿根廷傷兵滿營，雖然仍然召入球王美斯，但佢喺美職啱啱先後備復出，今仗領隊史卡朗尼未必會派佢上陣，巴拉圭鬥阿根廷一向靠死守搶分，近6次交手全開2球或以下，推介2.5球入球細。

（周五早上7時開賽）
國際足協公布2030年世盃，烏拉圭、阿根廷及巴拉圭會成為合辦國，將進行首3場分組賽，今仗係消息公布後，兩軍首度交鋒。阿根廷賽績似乎係無堅不摧，計埋世盃決賽周期間射贏12碼，阿根廷近12場全勝，即使攞完世盃，佢哋餘勢未止，6戰全勝射入17球，一球不失，確實令人憧憬。

不過阿根廷嚟緊兩場世盃外都唔能夠「夫添」應戰，保羅戴巴拿及祖安科夫入選後退隊，利辛度馬天尼斯做手術休息，至於美斯喺美職抖咗3場，上輪只係後備出場，史卡朗尼即使派佢上陣，狀態仍未十足，影響攻力。

龜縮戰術經常奏效
巴拉圭攻力有限，外圍賽2戰1和1負，而且都未能取得入球，今場作客都唔使諗住可以喺「潘帕斯雄鷹」身上入波，只能靠死守搶分，不過佢哋以往呢種龜縮戰術，對阿根廷都非常奏效，近6次交手巴拉圭獲1勝4和1負，全部開2球或以下，今場阿根廷唔係話贏就贏，有機會只係小勝收場，入球細抵玩過主W多多聲。