今晚英超獨腳戲，諾定咸森林主場硬撼賓福特。雖然森林一向靠主場搵食，但箭頭艾禾尼爾跌Watt影響攻力，賓福特3連敗陷低潮，今仗作客會先做好防守，2.5球入球細係明智之選。（Now 621周日晚9時直播）

森林上季能夠護級成功，全靠主場威力，上季取得嘅38分中，有30分係來自主場，今季開咧後打咗兩場主場聯賽，亦獲得1勝1和。不過佢哋嘅數胡人物艾禾尼爾腳風欠順，近3仗聯賽都食白果，森林呢3仗只入2粒，攻力受削，主帥谷巴惟有穩陣行先，各項賽事近4仗，雖然僅1勝及失咗4球，但其中2粒係失畀曼城，嗰場波仲係早早失咗呢兩球後，森林未有自亂陣腳，反而頂住「藍月亮」狂轟猛炸，之後對手打少個下，最終僅輸0比2，雖敗不辱，而呢4仗全開2球或以下，防守回穩。

賓福特連敗先求穩陣
另邊廂，賓福特各項賽事近6仗法定時間未贏過，上次贏波已經係8月中聯賽擊敗富咸，單計近3仗更加全部輸晒，包括輸畀弱旅愛華頓，表現慘不忍睹。賓福特最大問題係防守不穩，開咧後打咗8場，只有1仗冇失波，為咗止跌，今仗作客先鞏固防守，唔敢輕舉妄動。既然雙方狀態麻麻，相信都會踢穩陣波，今仗唔慌多波入，細盤有計。