今晚意甲上演「米蘭打吡」兼榜首大戰，由國際米蘭硬撼AC米蘭。兩軍近況都弗到漏油，不過A米傷停滿營，箭頭基奧特受傷影響攻力，相反國米射手拿達路馬天尼斯腳風奇順，加上近年碰頭食住A米，主勝捧得過。

（Now聽639周日凌晨零時直播）
兩軍都係頭3輪聯賽全勝，A米一眾車仔棄將基斯甸普列錫、羅夫度斯卓克加盟後大踢爭氣波，令人喜出望外。不過A米上輪擊敗羅馬之役，有中堅湯姆利領紅被逐，今仗要坐波監，而頭3輪入4粒嘅箭頭基奧特，喺國際賽期受傷而回，今仗應該未能趕及披甲，一前一後傷停，令攻守受削。

對戰A米拿達路特醒
另一邊廂，國米開季聯賽3戰全勝之餘，攻入8粒兼保持清白之身，係今季5大聯賽唯一仲未失波嘅球隊，攻守兼備。新任隊長拿達路馬天尼斯頭3輪入5粒，新兵馬古斯杜林亦已經開齋，佢同左翼衞費達歷高迪馬高各交出2個助攻，呢位名宿杜林囝囝逐漸適應意甲賽場。另一新兵中場法迪斯雖然喺國米未獲正選，但代表意大利喺歐國外對烏克蘭嘅生死戰省兩粒，成為贏波英雄，隨時係國米秘密武器，加上主帥恩沙基同球隊續約1年至2025年，有助穩定軍心。雙方近4次正面交鋒，國米全部贏晒，拿達路馬天尼斯喺其中3仗有士哥，擺明格食格，可乘勢於打吡戰贏波。