今晚歐國外D組關鍵戰，阿美尼亞主場硬撼克羅地亞。依家兩軍同分，為爭出線一定搏甩髀，不過克羅地亞實力秤先之餘，上仗大勝信心返晒嚟，加上佢哋出戰歐國外例搶韁，半場客勝有計。（周二凌晨零時開賽）

阿美尼亞防線欠集中
雖然阿美尼亞一向只係歐洲三線球隊，但喺今屆歐國外表現不俗，頭4輪取得2勝1和1負，絕對唔失禮。不過要留意，阿美尼亞呢4仗都有失波，尤其兩鬥榜首土耳其，都係領先之下最終失分，首輪喺主場土耳其反輸1比2，上仗作客喺下半場初段打破僵局，卻於完場前被追和1比1，防線明顯唔夠集中。

克羅地亞由於6月嗰陣要踢歐國聯，所以佢哋喺歐國外D組只係踢咗3場，現時與踢多1場嘅阿美尼亞同得7分排次席，但落後踢咗5輪嘅土耳其3分，只要今仗擊敗阿美尼亞，克軍出線形勢便大好。查實「格仔兵團」上輪大炒拉脫維亞5比0，總算走出歐國聯失冠嘅陰霾，睇番佢哋今屆3仗歐國外錄2勝1和，全部上半場取得領先優勢，今仗勢必先發制人，一開波即嚟料，半場客勝咪錯過。