今晚歐國外E組，阿爾巴尼亞主場鬥波蘭。論名氣及國際賽成績，波蘭梗係秤先，但呢支東歐球隊始終太過依賴羅拔利雲度夫斯基，易被對手防範，特別係阿爾巴尼亞防守硬淨，「羅拔佬」要入波並唔容易。翻查兩隊近5次對賽，4次總入球開2球或以下，最好揀中位數2.5球嘅入球細。（周一凌晨2時45分開賽）

師承意大利防守有心得
阿爾巴尼亞目前喺小組排第2，僅落後榜首捷克1分，表現令人驚喜。佢哋近年師承意大利，近11年大部分時間由意國主帥執教，奠定穩健戰術風格，就算今年1月請嚟巴西名宿施雲奴領軍，繼續用穩守突擊同對手周旋，上仗作客捷克都可以逼和對手1比1，主場出擊可望頂得住「羅拔佬」來犯。

波蘭現時僅排第3，想以前兩名出線，當然不容有失，但上仗對「魚腩」法羅群島，都要踢到73分鐘先靠「羅拔佬」射入12碼打開紀錄，完場前呢位巴塞射手梅開二度下贏2比0，冇乜說服力。波蘭首循環主場對阿爾巴尼亞，「羅拔佬」踢足全場都冇波入，僅小勝1比0，今次作客更難入波。