結束美國集訓嘅阿仙奴，周四凌晨進行最後一場季前熱身賽，喺酋長盃主場迎戰法甲球隊摩納哥。「兵工廠」近期全面撻着，新球員亦迅速融入，今場係新球季第1次喺主場亮相，肯定希望爭取漂亮勝仗振軍心，睇怕摩納哥好難頂得住，呢場入球騷阿仙奴會爭取大勝。（周四凌晨1時開賽）

阿仙奴夏天引入迪格蘭賴斯、夏維斯同祖利安添巴3名新兵，經過美國之旅集訓催谷，球員狀態明顯提升唔少，上場5比3大破巴塞隆拿，踢出流暢嘅進攻足球，德國國腳夏維斯近3場熱身賽入2球，顯示佢已融入球隊，配合着晒火嘅布卡約沙卡、李安度杜沙特同加比爾捷西斯等前鋒，火力相當強大。

摩納哥擅踢進攻足球

酋長盃係阿仙奴每年季前重頭戲，對上4屆有3次捧盃，包括上年6比0狂數西維爾，近6場酋長盃亦有5場總入球開3球或以上。摩納哥有賓耶達、禾蘭、淺野拓磨等星級攻擊手，新教練侯達都係擅踢進攻足球，季前熱身唔會介意同阿仙奴鬥攻，預料會有大量入球出現。