今日中午女子世盃有E組次輪賽事，由葡萄牙女足硬撼越南女足。兩隊首輪都係落筆打三更，葡萄牙女足最大問題係把握力弱，越南女足有自知之明一定玩死守，呢場比賽唔慌多波入，3.5球嘅入球細乃不二之選。

（Now聽630周四下午3時30分直播）

葡萄牙女足今次先係首度出戰女子世盃決賽周，經驗尚淺，喺E組首輪對住荷蘭女足即輸0比1，雖然佢哋早早失波，大把時間追，但質素所限埋門亦差，而且控球率、射門等數據都輸晒，輸波亦好正常，佢哋各項賽事近4仗僅入3粒，全開2球或以下，可見入球能力認真麻麻。

越南門將狀態勁弗

另邊廂，越南女足同樣係首次躋身決賽周，於E組首輪面對衞冕嘅美國女足未有懼色，負隅頑抗，儘管最終淨吞3蛋，但身高只有165cm嘅門將陳氏金清，對住一眾高大嘅「美女」仍屢救險球，包括撲出射手阿歷絲摩根嘅12碼，先至冇再失幾球，鬥志相當頑強。不過越南女足冇乜大賽經驗，預計今仗都係靠死守迎敵，葡萄牙女足臨門一腳咁差，3.5球嘅入球細不容錯過。