今日傍晚上演一場重量級熱身賽，拜仁慕尼黑喺日本新國立競技場火併曼城。兩隊上季喺歐聯8強交鋒，曼城兩回合總比數贏4比1，最終成功捧盃，今次雙方喺日本集訓對賽，試陣味濃，加上近5次交手4次半場開1球或以下，半場細值得一試。（無綫myTV聽SUPER周三晚上6時30分直播）

拜仁慕尼黑開操後喺本土踢熱身賽，曾以27比0狂數一支業餘球隊，共有13人取得入球，其中穆斯亞拿、已轉投多蒙特嘅沙比薩同泰爾各入5球，盛傳離隊嘅沙迪奧文尼都有「士哥」；拜仁今季重要收購暫時有金玟哉，亞洲集訓對呢位南韓國腳相對有利，令佢容易適應，另兩位新加盟球員拉菲爾古里路及干拉特賴馬亦要透過比賽融入球隊，熱身賽點到即止。

實力相近點到即止
今場係曼城日本集訓第2站，佢哋上場贏橫濱水手5比3，史東斯、祖利安艾華利斯、洛迪卡斯簡迪都「開齋」，艾寧夏蘭特更起孖，但係今仗對同級對手拜仁先係真正考驗，哥迪奧拿會盡可能讓隨隊球員落場，以達試陣目的，不過奇雲迪布尼仲養緊傷，新加盟嘅高華錫融入體系需要時間，預計今場會慢慢踢，半場細穩陣。